Социјалните мрежи претставуваат закана за здравјето на младите споредлива со пушењето, се наведува во нов драматичен извештај на Академијата на медицински кралски колеџи, пренесува The Independent.
Во извештајот се предупредува дека лекарите сè почесто се соочуваат со деца изложени на штетни и вознемирувачки содржини, зависност и онлајн радикализација. Истражување меѓу 454 лекари покажало дека речиси половина секоја недела лекуваат барем едно дете со проблеми директно поврзани со онлајн содржини.
Извештајот доаѓа во период на владини консултации за можни мерки, меѓу кои се разгледува забрана за користење социјални мрежи за малолетници под 16 години, ограничување на користење во одредени периоди и укинување на зависнички функции во апликациите.
Поранешниот министер за здравство Вес Стритинг изјави дека социјалните мрежи треба да се третираат слично како тутунските производи, предупредувајќи дека технолошките компании користат слични тактики за создавање зависност кај корисниците.
Владата најавува дека мерките се во подготовка и дека се разгледува широк спектар на решенија за заштита на младите, додека дел од експертите бараат построга регулација на самите платформи и нивните алгоритми, а не само ограничување на возраста.
Според најавите, предлозите треба да бидат претставени до летото, а законските измени би можеле да следуваат до крајот на годината.
