Бројот на загинати во рускиот вечерашен напад врз Киев се искачи на 16, меѓу кои има и две деца. Повредени се уште 57 лица, од кои 27 се хоспитализирани, соопштија украинските служби за итни случаи и градоначалникот Виталиј Кличко.
Спасувачките екипи продолжуваат со потрагата по преживеани во населбата Дарницки, каде на терен се ангажирани 170 спасувачи со механизација и тимови со кучиња. На местото има и психолози кои им помагаат на погодените граѓани.
Првичните информации беа дека се загинати 12 луѓе, но бројката подоцна беше зголемена на 16, додека потрагата под урнатините сè уште трае и бројот може дополнително да се менува.
Градоначалникот Кличко прогласи 15 мај за ден на жалост во Киев, во чест на жртвите. Знамињата ќе бидат спуштени на половина копје, а сите забавни настани во градот се откажани.
