Фудбалерките на Тиверија Брера убедливо триумфираа над Каменица Саса со 5:0 во финалето на Купот на Македонија во женска конкуренција и го освоија својот втор трофеј во ова натпреварување.
Финалниот натпревар се одигра на стадионот во Ѓорче Петров, а Тиверија Брера уште од самиот старт покажа дека е решена да доминира на теренот.
Првата сериозна можност ја имаше Карапузовска, која во осмата минута ја погоди пречката, додека Каменица Саса возврати преку Димитровска, чиј удар со глава заврши во дирекот.
Резултатот беше отворен во 28. минута, кога по ВАР проверка беше досуден пенал за Тиверија Брера по прекршок врз Панова. Галабоска беше сигурна од белата точка и донесе водство од 1:0.
Само две минути подоцна Николовска со прецизен удар од слободен удар зголеми на 2:0, а Паневска во 34. минута постигна гол за убедливи 3:0 пред паузата.
Во второто полувреме следуваше нова доминација на Тиверија Брера. Бошевска во 50. минута стрелаше за 4:0 по асистенција на Божинова, а истата фудбалерка во 84. минута со одличен удар ги постави конечните 5:0.
Со оваа убедлива победа, Тиверија Брера стигна до вториот куп-трофеј во својата клупска историја.
