На 3 март 2026 година (вторник), со почеток во 19:00 часот, во фоајето на Националната опера и балет ќе се одржи свечена промоција на монографијата „Мојот пат“ – дело што го осветлува животот и творечкиот печат на Антон (Тони) Баталаковски, една од клучните фигури во развојот на македонскиот балет.
Автори на монографијата се др. Соња Здравкова-Џепароска и др. Александар Трајковски, кои низ аналитички и документарен пристап го реконструираат професионалниот и личниот пат на уметникот. Изданието е реализирано со поддршка на Министерството за култура и туризам на Република Северна Македонија.
Книгата нуди темелен и интерпретативен увид во сценската кариера на Баталаковски, неговата педагошка и репетиторска работа, како и сведоштва што ја доловуваат неговата личност – дисциплинирана, визионерска и посветена на уметноста.
Како првенец на Балетот и прв директор на тогашното МНТ – ООЗТ Балет, Баталаковски одигра значајна улога во институционалното оформување и уметничкото зацврстување на балетската сцена во Македонија. Неговата работа не е само дел од историјата, туку и темел врз кој се гради современиот македонски балет.
Монографијата „Мојот пат“ претставува културен документ за едно време и една мисија – сведоштво за посветеноста на уметник кој ја живеел сцената како судбина, а уметноста како повик.
