Струмица и годинава ќе пулсира во знакот на карневалската традиција. Повеќе од 1.000 учесници, 30 маски од Македонија и 11 од странство ќе продефилираат на главната интернационална поворка што ќе се одржи на 21 февруари, додека програмата ќе трае до 25 февруари.
Струмички карневал важи за една од највпечатливите традиционални манифестации од ваков тип во земјава. Неговите корени се поврзуваат со празникот Тримери, а карневалската традиција во Струмица е забележана и во записите на турскиот патописец Евлија Челебија. Од 1994 година, градот е дел од меѓународната асоцијација на карневалски градови FECC.
Според претседателката на Организацискиот одбор, Танкица Стојанова, карневалот не е само настан, туку жив обичај што струмичани го негуваат како дел од сопствениот идентитет. Секоја година, додава таа, подготовките се прават со цел програмата да понуди квалитет и разновидност.
Покрај традиционалната поворка, годинава програмата носи и новини. За првпат ќе биде поставен мјузиклот „Аладин и волшебната ламба“ на македонски јазик, во кој ќе настапат 130 деца и млади. Во петок е планирана и изложба со наслов „Карневалот – танц на бојата и радоста“, на која ќе учествуваат ученици од основните училишта.
По завршувањето на интернационалната поворка, на централната сцена на плоштадот „Гоце Делчев“ ќе настапи Кирил Џајковски со специјално подготвена програма. Организаторите посочуваат дека интересот годинава е зголемен, со повеќе пријавени маски и групи што повторно се враќаат по неколку години пауза.
За детскиот карневал, што ќе се одржи во недела, се очекуваат повеќе од 600 учесници. Според организаторите, растечкиот број учесници ја потврдува важноста на карневалот како културен и туристички белег на градот.
Главен покровител е Општина Струмица, која од буџетот издвои 3,7 милиони денари, а поддршка има и од Министерството за култура и туризам, како и од приватниот сектор.
Главната поворка е закажана за 21 февруари, а карневалската атмосфера ќе трае до 25 февруари, со очекувања за бројни посетители од земјава и од странство.
