Ќе побрза ли ЕУ во разрешување на проблемот кој сама го направи околу камионџиите? Уште ќе ги смета за мигранти или како професионалци кои се од земји кандидати за членство во Унијата?
Прашањата се наметнуваат иако е најавено дека проблемот повторно се враќа на маса во Брисел. Искуството вели дека често на масата во ЕУ не се донесуваат соодветни и брзи одлуки.
Сепак, добро е што министерот за транспорт Александар Николоски најави технички состанок на 24 февруари. Тогаш мора сите да бидат поисполнителни и да не се случи како со давањето на датум на Македонија за преговори. Нон-стоп се кажува од евробирократите дека датумот еве го доаѓа, а годините поминуваат.
Со протестите и блокадите, превозниците јасно порачаа дека нема да прифатат нерамноправен третман, но и на македонските политичари им докажаа дека обединети можат да изнудат реакција од ЕУ.
Ако Брисел навистина се залага за партнерство и стабилни економски односи, решението не смее да се развлекува со месеци. Проблемот е производ на европската бирократија и токму европските институции треба брзо да го корегираат.
