Глумицата Ен Хатавеј мислела дека живее во бајка, само за таа бајка да се сруши преку ноќ.
Пред неколку години, холивудската ѕвезда Ен Хатавеј постојано го фалела својот тогашен партнер, шармантниот Италијанец Рафаело Фолиери, кој се претставувал во јавноста како успешен бизнисмен и човек од доверба, но подоцна се покажало дека сè е голема илузија.
На почетокот, Ен Хатавеј била целосно маѓепсана од агентот за недвижности кој ѝ дал сè што сакала и се однесувал кон неа како кон вистинска принцеза. Ја водел на луксузни патувања со приватни авиони, а во една прилика потрошил околу 100.000 евра само за да стигне до новогодишната ноќ кај дизајнерот Оскар де ла Рента во Доминиканската Република. Двојката престојувала во најскапите хотели низ Европа, додека во Њујорк живееле во луксузен стан на Менхетен, чија месечна кирија била околу 34.000 евра.
Тврдел дека тесно соработувал со Ватикан
Фолиери тврдел дека тесно соработувал со Ватикан и барал инвеститори за проекти поврзани со црковно земјиште, уверувајќи ги дека има дозвола да дејствува во име на Католичката црква. Ен му верувала и го поддржувала тогаш, сè додека не открила дека е само измамник.
„Се запознавме во 2004 година, имав 25 години. Имаше многу убави моменти и чувствував дека сè ми е достапно. Се сеќавам една ноќ кога Ен снимаше во друга земја, а јас размислував во нашиот стан како можам да имам сè што ќе посакам“, рекол Фолиери во интервју за „Дејли меил“.
Сè се урнало кога бил откриен
Сè се урнало на 24 јуни 2008 година, кога бил уапсен за финансиска измама. „Разговаравме по телефон таа вечер. Таа ми рече: ‘Те сакам засекогаш’. Четири часа подоцна, полицијата затропа на вратата. Никогаш повеќе не разговаравме“, се присетил тој.
Иако тврди дека нема омраза кон Ен, признава дека нејзиното молчење длабоко го повредило. „Таа никогаш не ме контактирала, дури ни преку порака. Мислам дека одлучила да ја заштити својата кариера. Не сум огорчен, но сум повреден“, рекол тој.
Фото: wikitia
Неговиот случај е познат како „Вати-Кон“, бидејќи било откриено дека лажно тврдел дека има врски со Ватикан и дека ги злоупотребил парите на инвеститорите, вклучувајќи го и милијардерот Рон Баркл, близок пријател на поранешниот претседател Бил Клинтон.
На суд, тој ги признал сите 14 точки од обвинението, со што избегнал можна казна од 160 години затвор (што е доживотна казна затвор). Наместо тоа, тој поминал четири и пол години зад решетки, а по ослободувањето бил депортиран во Италија и му било забрането да се врати во САД.
Денес Рафаело Фолиери има 43 години, тој е во брак со Константина, пријателка од Њујорк која му останала верна во тешките времиња. Тие имаат син, Паскал, и наскоро очекуваат ќерка. Неговата компанија „Фолиери Енерџи“ управува со 162 бензински пумпи проценети на повеќе од 170 милиони евра, додека вредноста на неговата матична компанија „Fholding UAE“ е непозната.
Од друга страна, Ен Хатавеј е среќно мажена за Адам Шулман од 2012 година, со кого има два сина, а нејзиниот живот, се чини, сега е сосема мирен и далеку од скандалите што некогаш ја следеле.
Фото: Принтскрин/YouTube
