Судија на претходна постапка при Основниот кривичен суд Скопје му одреди 30-дневен притвор на директорот на Државниот инспекторат за земјоделство, Васе Анакиев, кој е осомничен за примање мито.
Мерката е изречена по предлог на Основното јавно обвинителство за гонење на организиран криминал и корупција, кое отвори истрага против него. Од Кривичниот суд информираат дека притворот е определен по сите три основи – опасност од бегство, влијание врз сведоци и можност за повторување на делото.
Според информациите од истражните органи, осомничениот барал поткуп од 100.000 евра од сопственик на фирма, кој требало да биде исплатен во три рати. За возврат, тој ветувал дека ќе овозможи влез на стока во државата, која претходно била задржана на граничен премин.
Како што посочуваат од МВР, осомничениот ја образложувал забраната со наводно неисполнување на законските услови за увоз. Сепак, според обвинителството, станува збор за притисок врз службени лица со цел да се изнуди поткуп, иако истата стока и претходно повеќепати била увезувана.
Истрагата опфаќа период од 5 март до денот на приведувањето, во кој, како што се наведува, осомничениот директно ги барал парите и вршел притисоци за да го оствари барањето.
