СВР Тетово поднесе кривична пријава против четири лица – Ш.Ф. (54) и З.З. (48) од Тетово, М.Ф. (29) од Долно Количани и И.А. (54) од Шемшево, поради основано сомнение дека сториле кривично дело измама при купопродажба на недвижен имот.
Според информациите од полицијата, случајот започнал во декември 2024 година, кога првоосомничениот и второосомничениот ја довеле во заблуда оштетената жена, уверувајќи ја дека можат да посредуваат при купување куќа во Тетово, која наводно била во сопственост на нивни роднини. Договорената цена изнесувала 135.000 евра.
Верувајќи им на нивните тврдења, жената во два наврати им исплатила вкупно 8.600 евра. Измамата била откриена во март 2025 година, кога оштетената дознала дека куќата всушност е во сопственост на сосема друго лице.
При обид да го пријави случајот во полиција, третопријавениот И.А. ја одвратил од намерата да поднесе пријава. Подоцна, осомничените ѝ вратиле само дел од парите, односно 5.100 евра, додека остатокот го задржале за себе.
По тоа, тие целосно го прекинале контактот со оштетената, ја блокирале на социјалните мрежи и одбивале понатамошна комуникација.
