27-годишна жена од Тетово пријавила во СВР Тетово дека била намамена да влезе во возило под изговор дека заедно со друго лице ќе пријават злоупотреба на лични податоци и отворање на лажен профил на социјална мрежа.
Според пријавата, на 11 мај околу 18 часот таа се сретнала со лицето Х.Е., кое ѝ предложило да одат во полициска станица за пријава на случај поврзан со наводен лажен профил. Откако влегла во возилото, забележала дека на задното седиште се наоѓа уште едно машко лице.
Наместо кон полициска станица, возилото се упатило во друга насока, при што, според наводите, лицата ѝ упатувале закани и се обиделе да ѝ го одземат мобилниот телефон, сомневајќи се дека таа стои зад спорниот профил.
По одредено време, жената била вратена во Тетово, а случајот го пријавила во полиција на 12 мај во 13 часот.
Од СВР Тетово информираат дека се преземаат мерки за целосно расчистување на настанот.
