Украинскиот претседател Володимир Зеленски порача дека Украина ќе продолжи да изведува прецизни напади врз цели длабоко на руска територија, со цел, како што рече, да ѝ покаже на Русија и на нејзините граѓани дека единствено решение е прекин на војната.
Според Зеленски, украинските сили погодиле уште еден објект на руската нафтопреработувачка индустрија, кој се наоѓа во Тоболск, во Сибир, на повеќе од 2.500 километри од украинската граница.
„Бележиме уште еден успех на нашите украински одбранбени сили – погоден е уште еден објект на руската нафтопреработувачка индустрија, и тоа на значително растојание – повеќе од 2.500 километри. Се наоѓа во Тоболск, во Сибир. Сега и тој регион е во досег на нашите прецизни удари. Тоа е многу значаен успех на нашите украински војници. Им благодарам на сите за прецизноста. Ќе има уште украински прецизни удари за да ѝ покажеме на Русија и на рускиот народ дека е неопходен мир“, изјави Зеленски.
Тој додаде дека, според информации од внатрешни истражувања на јавното мислење во Русија, сè повеќе руски граѓани сакаат војната да заврши.
Зеленски оцени дека тој тренд треба дополнително да се засили, со цел руското раководство, предводено од претседателот Владимир Путин, јасно да сфати дека нема друга опција освен мирно решение на конфликтот.
