Основен кривичен суд Скопје денеска му изрече затворска казна од 11 години на 25-годишниот Фатон Љури, кој беше прогласен за виновен за тешката сообраќајна несреќа што се случи на 1 јули годинава.
Љури со мотоцикл марка „Кавасаки“ удрил пешак на кејот на реката Вардар, на површина наменета исклучиво за пешаци, по што избегал од местото на несреќата. Повредениот, 68-годишниот Југослав Николовски, подоцна им подлегнал на повредите во Клиничкиот центар, како последица на тешки повреди на главата.
Судијката Снежана Марковска во образложението на пресудата наведе дека обвинетиот управувал мотоцикл без возачка дозвола и без регистарски таблички, со што свесно го довел во опасност животот на другите учесници во сообраќајот.
Покрај затворската казна, на Љури му е изречена и петгодишна забрана за управување со моторно возило од А категорија, а мерката притвор му е продолжена до правосилноста на пресудата.
