Пак во Македонија е констатирано дека лекарите препишуваат премногу антибиотици на пациентите. Фондот за здравствено осигурување најави дека ќе воведе контрола и казнени мерки за матични лекари кои ги надминуваат квотите за препишување на антибиотици и анксиолитици.
Зарем треба контроли и казни за лекарите да увидат дека се претерало со антибиотиците и дека тие не се бомбони за да се делат насекаде?
Особено загрижува податокот дека употребата на силниот антибиотикот „Сумамед”, значително се зголемила за дури 23%, Па тоа е лек кој треба да се користи како резервна опција само во тешки случаи, а не како прв избор за секоја инфекција.
Ова ли треба да го учат некои лекари? Па тие треба да знаат и во сон дека неоправданото и пречестото користење на антибиотици може да доведе до развој на антимикробна резистентност, односно со тек на времето стандардните третмани со антибиотици да стануваат неефикасни.
Се чини ресорното министерство треба да организира кратки предавања за лекарите, за да ги освежат знаењата.
