Состојбата со пожарите на отворен простор во текот на вчерашниот ден била исклучително тешка, со вкупно 29 регистрирани, информира директорот на Дирекцијата за заштита и спасување, Стојанче Ангелов.
Од нив, 22 биле целосно изгаснати благодарение на брзата реакција и ангажманот на локалните пожарникари, еден пожар е ставен под контрола, а шест и натаму се активни.
Кај Македонски Брод, во атарот на селото Драгов Дол, денеска се применува посебна тактика за гаснење. Во близина на пожарот е поставен голем импровизиран базен од кој хеликоптерот ќе зема вода и ќе дејствува врз огнот во кратки интервали, односно на секои четири до пет минути. На терен се и тимовите за брз одговор на Дирекцијата за заштита и спасување, составени од 25 доброволни пожарникари и пет оперативци.Ангелов очекува пожарот кај Драгов Дол да биде целосно изгаснат во текот на денот.
Активен е и пожарот во атарот на селата Борино и Житоше во Општина Крушево. Рано утрово таму е испратен тим од 20 доброволни пожарникари, а според Ангелов, пожарот е пред целосна ликвидација. Се очекува до пладне да биде ставен под целосна контрола, по што ќе следи проверка и негово целосно гаснење.
Повеќе денови активен е и пожарот во атарот на селото Рамни Габер, Општина Студеничани. Огнот не ја зголемува динамиката, но се движи по исклучително тежок и делумно непристапен терен. Поради тоа, можно е да се интервенира со „ер трактори“.
Пожар има и на територијата на Велес и Зелениково. Од велешка страна е во атарот на селото Слп, а од страната на Зелениково се движи кон селата Добрино и Тисовица. Гори ниска вегетација, шума и габер, а поради непристапниот терен, по потреба ќе биде обезбедена и воздушна поддршка.
Во Општина Јегуновце, кај Копанце, и натаму е активен пожарот што гори веќе неколку дена. Таму гори мешана шума, грмушки и тревна вегетација, а Дирекцијата планира да дејствува со „ер трактори“ за да спречи ширење на огнот. Активен пожар има и во атарот на селото Конопница во Општина Крива Паланка.
Ангелов повторно апелираше до граѓаните да бидат внимателни и да не преземаат активности со кои може да предизвикаат пожар.
„Ве молам, внимавајте. Доволна е само искра за вистинска катастрофа“, порача тој, посочувајќи дека и пожар кој нема да прерасне во национална катастрофа може да биде трагедија за семејството на кое ќе му изгори домот или викендичката.
Тој се осврна и на пожарот што синоќа околу 2 часот избувнал над Зелениково и директно се заканувал на куќи од последниот ред на ридот.Според Ангелов, жителите веднаш реагирале, прскале со вода и отстранувале грмушки и дрвја во близина на куќите. Потоа пристигнал и градоначалникот на Зелениково со општинското противпожарно возило, заедно со доброволни пожарникари, а набргу пристигнала и скопската професионална противпожарна екипа. Заедничката интервенција спречила огнот да стигне до куќите.
Ангелов изрази сомневање дека пожарот бил намерно предизвикан, бидејќи избувнал околу 2 часот по полноќ, во непристапен простор и во непосредна близина на куќи.
„Повеќе од сигурен сум дека овој пожар е предизвикан намерно“, рече Ангелов, додавајќи дека се работи на откривање на причинителот.
