Според неофицијални информации од српските медиуми, припадници на полицијата и војската го пребаруваат теренот во општина Кањижа, барајќи недозволени супстанции кои се опасни по животот на граѓаните и делови од витална инфраструктура.
Полициската управа во Суботица, со припадници на Управата за криминалистичка полиција, заедно со Воената полиција и други единици на српската армија, од раните утрински часови се ангажирани во блокирање и пребарување на дел од територијата во општина Кањижа, со цел да се бараат недозволени супстанции опасни по животот на граѓаните и делови од витални инфраструктурни објекти во тој дел од Србија.
Полицијата и војската го пребаруваат подрачјето на патот Трешњевац-Војвода Зимоњиќ, како и на патот кон селото Велебит. Пребарувањето се спроведува од земја, со контрола и координација од воздух. Хеликоптери летаат над областа.
Се огласи и претседателот на Србија, Александар Вучиќ. Тој соопшти дека е пронајден експлозив со голема разорна моќ во близина на гасната инфраструктура што ги поврзува Србија и Унгарија.
„Штотуку завршив телефонски разговор со унгарскиот премиер Виктор Орбан, кого го информирав за првите резултати од истрагата на нашите воено-полициски органи“, напиша Вучиќ.
Тој додаде дека српските единици пронашле експлозив и запаливи фитили неопходни за негово активирање. Вучиќ посочи дека унгарската страна ќе биде редовно информирана за понатамошниот тек на истрагата.