Претседателот на Србија, Александар Вучиќ, најави дека во недела, 27 септември, ќе ја поднесе оставката од функцијата шеф на државата.
Вучиќ пред новинарите во Њујорк изјави дека оставката ќе ја достави во вечерните часови, околу 20 часот, а воедно најави дека тогаш ќе ги образложи причините за својот потег.
„Во недела е напорен ден, во недела навечер поднесувам оставка, мислам дека ќе биде околу осум часот навечер“, изјави Вучиќ.
Тој додаде дека граѓаните ќе имаат можност да го слушнат неговото образложение за одлуката.
Освен за оставката, српскиот претседател во Њујорк говореше и за прашањето поврзано со Нафтената индустрија на Србија (НИС), посочувајќи дека очекува по разговорот со рускиот претседател Владимир Путин да има повеќе информации за можното решение.
На прашањето дали сега е појасна ситуацијата околу НИС, Вучиќ рече дека во моментов не може да даде конкретен одговор, но дека се надева оти по средбата со Путин ќе има попрецизни информации.
Во Њујорк, каде учествува на меѓународни средби, Вучиќ посочи и дека со повеќе светски лидери разговарал за специјализираната изложба Експо 2027, која ќе се одржи во Белград.
Тој нагласи дека Србија мора да биде најдобар домаќин на овој настан, кој ќе се одржи од 15 мај до 15 август 2027 година под темата „Игра(ј) за човештвото: спорт и музика за сите“.
