Во земјава е регистриран втор смртен случај од западнонилска треска, откако на Клиниката за инфективни болести и фебрилни состојби во Скопје почина 72-годишен маж од Скопје.
Информацијата ја соопшти директорот на Клиниката, Фадил Цана, кој информираше дека кај пациентот лабораториски била потврдена инфекција со West Nile вирус, со тешка клиничка слика на менингоенцефалитис.
„Кај пациент на 72-годишна возраст со лабораториски потврдена инфекција со West Nile вирус и тешка клиничка слика на менингоенцефалитис, за жал, настапи смртен исход“, изјави Цана.
Пациентот бил примен во тешка општа состојба, со изразени невролошки симптоми и сериозно воспаление на мозокот и мозочните обвивки. И покрај интензивното лекување и максималните напори на медицинскиот тим, неговата состојба се влошила.
Директорот на Клиниката посочи дека досегашните жртви од западнонилската треска се повозрасни лица со присутни придружни заболувања.
Во моментов на Инфективната клиника се хоспитализирани 24 пациенти. Кај 19 од нив инфекцијата е лабораториски потврдена, додека пет пациенти се сомнителни случаи и се во тек на дијагностички процедури.
Седум пациенти имаат потешка клиничка слика и се под постојан интензивен медицински надзор, а петмина се приклучени на механичка вентилација. Останатите пациенти се сместени на Одделот за невроинфекции и се во стабилна состојба.
Од Клиниката информираат дека состојбата на пациентите се следи континуирано и јавноста ќе биде информирана за сите значајни промени.
Ова е втор смртен случај од западнонилска треска во Македонија, откако претходно од истиот вирус почина 83-годишен пациент.
