Во периодот од 2012 до 2025 година во дискотеката „Пулс“ во Кочани не била спроведена ниту една инспекциска контрола од инспектор за противпожарна заштита. Овој податок беше изнесен пред Основниот кривичен суд во Скопје при презентацијата на градежното вештачење во судскиот процес за катастрофалниот пожар во кој животот го загубија 63 лица, а повеќе од 200 беа повредени.
Судската вештачка Маријана Лазаревска ги образложи наодите од вештачењето, при што посочи на сериозни пропусти во противпожарната заштита и безбедноста на објектот. Според вештачењето, влезната врата не ги исполнувала пропишаните безбедносни стандарди, а клубот немал соодветно проектирани и обезбедени евакуациски патишта за безбедно напуштање на објектот во случај на пожар.
Во извештајот се наведува дека објектот требало да располага со соодветна техничка документација и системи кои ќе овозможат конструкцијата да ја задржи својата носивост при пожар, да се спречи ширењето на огнот и чадот и да се обезбеди безбедна евакуација на посетителите. Според презентираните наоди, ниту еден од овие клучни услови не бил исполнет.
Особено внимание на денешното рочиште беше посветено на фактот дека цели 13 години клубот не бил предмет на контрола од надлежен инспектор за противпожарна заштита. Според обвинителството, Дирекцијата за заштита и спасување во тој период не обезбедила инспектор за подрачјето на Кочани, а дискотеката „Пулс“ не била опфатена ниту со плановите за редовни инспекциски надзори, иако станувало збор за објект во кој редовно престојувал голем број посетители.
Обвинителството тврди дека клубот од 2012 до трагичниот пожар во 2025 година незаконски вршел угостителска дејност, без исполнување на минималните технички услови за работа. Дополнително, според обвинението, во објектот биле изведувани градежни интервенции без соодветни дозволи и без стручен надзор.
Во вештачењето е наведено и дека во ентериерот биле користени лесно запаливи синтетички и полимерни материјали, кои значително придонеле за брзото ширење на пожарот и густото задимување, што им ја отежнало евакуацијата на присутните.
Одбраната на сопственикот на „Пулс“ ги оспорува дел од наодите и методологијата според која е изработено градежното вештачење, додека конечната оценка за доказите и евентуалната одговорност на обвинетите ќе ја донесе судот по завршување на доказната постапка.
Пожарот во дискотеката „Пулс“ избувна во раните утрински часови на 16 март 2025 година, кога пиротехнички средства употребени за време на музички настап го запалија плафонот на објектот. Трагедијата, во која загинаа 63 лица, а повеќе од 200 беа повредени, се смета за една од најголемите несреќи во поновата историја на Македонија.
Во судскиот процес обвинети се поранешни функционери, инспектори, сопственици и управители на клубот, лица од обезбедувањето, како и други службени лица, кои според обвинителството со своето постапување или непостапување придонеле за трагичниот исход.
