Во Кривичниот суд Скопје продолжи судењето на Стојанче Јовановски, обвинет дека ја принудил сопругата Ивана да си го одземе животот во прегратка со нејзината 6-годишна ќерка Катја, но и за семејно насилство и малтретирање.
Неговиот поранешен пријател и колега Мартин Саздов, сведочеше за нивниот однос и за врската со покојната Ивана Јовановска и потенцираше детаљ од август 2025 година кога сега покојната Ивана го повикала со плачење во 1 часот ноќе со молба да ги земе заедно со ќерката откако Стојанче ги изфрлил од возилото на влезот од Штип.
Тој сведочеше дека по настанот во Штип се зближил со Ивана и подоцна започнал љубовна врска, а таа поднела тужба за развод и отишла да живее кај мајка ѝ, но по смртта на нејзиниот татко под закани и уцени, била принудена да се врати да живее во станот со Стојанче, а престанале и да се гледаат и зборуваат.
Запрашан од обвинителката дали Ивана му кажала дека Стојанче ја уценувал –сведокот Мартин Саздов одговори дека ѝ се заканувал дека ќе ги објави нејзините видеа со експлицитна содржина за да ја посрамоти како родител на Катја.