Од почетокот на сезоната на вирусот Западен Нил, заклучно со вчера претпладне, во Грција се потврдени вкупно 232 случаи на зараза, додека 19 лица починале како последица од инфекцијата, покажуваат најновите податоци на Националната организација за јавно здравје (ЕОДИ).
Само во текот на изминатата седмица биле регистрирани 75 нови случаи, а шест лица ја загубиле битката со болеста.
Според извештајот, кај 165 заразени се развиле потешки симптоми со зафатеност на централниот нервен систем, како енцефалитис, менингитис или акутна парализа. Просечната возраст на овие пациенти е 75 години.
Кај уште 67 лица инфекцијата поминала со поблаги симптоми или без зафатеност на централниот нервен систем.
Во моментов, 73 пациенти се хоспитализирани, 124 веќе се пуштени на домашно лекување, а кај 16 заразени не било потребно болничко лекување.
Сите 19 починати биле постари од 65 години, а нивната просечна возраст изнесува 85 години.
Најголем број од заразените, односно 137 случаи, се регистрирани во областа Атика, поширокиот регион на Атина. Останатите случаи се евидентирани во Тесалија, северна и централна Грција, како и на Пелопонез, додека за 18 случаи сè уште се спроведува епидемиолошка истрага за утврдување на местото на заразување.
Здравствените власти во Грција апелираат граѓаните да преземат мерки за заштита од комарци, бидејќи вирусот Западен Нил најчесто се пренесува преку нивно каснување.
