Владата, на предлог на Министерството за транспорт, донесе одлука за ограничување на пловидбата на пловни објекти на Охридското, Преспанското и Дојранското Езеро, со цел зголемување на безбедноста на капачите и учесниците во пловидбата.
Од Министерството информираат дека мерката има за цел заштита на човечките животи, намалување на ризикот од несреќи и обезбедување непречено користење на езерските води во текот на летната туристичка сезона.
Според одлуката, пловидбата на скутери ќе биде ограничена во периодот од 1 јули до 31 август 2026 година, секој ден во временскиот интервал од 11:00 до 19:00 часот.
Дополнително, воведени се и временски ограничувања за пловидба на чамци. Од 3 јуни до 31 август 2026 година чамците нема да смеат да пловат од 21:00 до 05:00 часот. Во септември забраната ќе важи од 20:00 до 06:00 часот, а во октомври од 19:00 до 06:00 часот.
Од Министерството за транспорт посочуваат дека надлежните служби ќе спроведуваат засилени контроли на терен и дека за непочитување на ограничувањата ќе следуваат соодветни мерки согласно законските прописи.
Воедно, упатен е апел до сопствениците и управувачите на скутери и чамци да ги почитуваат правилата за пловидба, безбедносните зони и насоките од надлежните органи, со цел безбедно користење на езерата во текот на туристичката сезона.
