Паркирањето во централниот дел од Скопје е голем проблем. Дури и кога си подготвен да платиш, треба најмалку половина час да бараш слободно место. Да, беа изградени неколку катни гаражи, но, не се доволни, а и слабо се одржувани.
Една таква гаража е „Разловечко востание” помеѓу ГТЦ и Работничкиот дом. На прв поглед делува импозантно со 9 надземни и едно подземно ниво, со паркинг простор за 516 возила. Но, внатре нашата новинарска екипа виде дека состојбата е како востанието уште да трае.
Слободен паркинг имаше дури на 7-мото ниво. А за симнување откако ќе паркираш мора пеш, не работи лифтот. И кога ќе тргнеш пеш, ти почнува голготата, нема излез на секое ниво затоа што рачките на вратите се искршени и вратите не се отвораат. Па мора да се вратиш назад и да одиш таму каде е предвидено за возилата. Исто е и за нагоре…
И чистотата не е на потребното ниво.
Е, за сето тоа се наплаќа 60 денари од час. Значи, за еден час од 500 паркирани возила се приходува по 500 евра, за еден ден од 16 часа работно време – околу 8.000 евра. За еден месец тоа се 240.000 евра. Еве и нека не е секогаш полно, нека се приходите 160.000 евра, зарем на ЈП за стопанисување со станбен и деловен простор под чија надлежност е гаражата не му останува ништо од парите за да ги поправи рачките на вратите, да ги исчисти скалите и да ги сервисира лифтовите?
А каде е фактот дека мора и нови паркинзи да се направат оти не се доволни? Или и за градење пак скопјани преку буџетот ќе позлатат?
