Двајца патници и понатаму се во критична состојба по масовниот напад со нож што се случи синоќа во возот на компанијата London North Eastern Railway (LNER) кој се движел од Донкастер, во јужен Јоркшир кон Лондон, соопшти британската полиција.
Според полициските информации, десет лица биле повредени, од кои девет со повреди опасни по живот. Четворица веќе се пуштени од болница, додека двајца се во критична состојба.
Контролорот Џон Ловлес на прес-конференција на станицата Хантингдон го откри идентитетот на двајца мажи уапсени за нападот.
„Станува збор за 32-годишен маж, британски државјанин со црна боја на кожа, и 35-годишен маж од карипско потекло. Двајцата се родени во Велика Британија“, рече Ловлес.
Тој додаде дека засега нема индиции дека станува збор за терористички напад. Истрагата ја води британската полиција, со поддршка од антитерористичките единици кои помагаат во утврдување на околностите и мотивот на нападот.
Претходно, британскиот министер за одбрана Џон Хили изјави дека се работи за „изолиран напад“ и дека нема потреба од зголемување на нивото на терористичка закана во земјата.
Според сведочењата на патниците, еден од напаѓачите ненадејно почнал да ги сече луѓето со нож, откако возот поминал низ Питерборо. Полицијата околу 19:40 примила повеќе повици од возот, кој потоа бил запрен на станицата Хантингдон, по околу 15 минути возење од Питерборо.
На местото пристигнале наоружани полициски единици кои влегле во возот и ги уапсиле двајцата осомничени. Сведоци изјавиле дека полицајците употребиле електрошокер за да совладаат еден од нив кој држел нож.
На терен биле испратени бројни екипи за итна помош, вклучително и хеликоптерска медицинска служба. Полицијата проценува дека целиот инцидент траел меѓу 10 и 15 минути. Неповредените патници биле испрашани, а дел од нив со автобус биле превезени во Лондон.
⚠️WARNING: This post describes a suspected terrorist incident involving mass casualties.
A suspected terror attack on a train near Huntingdon, Cambridgeshire, left 10 people with knife wounds on Saturday night.
British Transport Police were called to the LNER train (the 6:25 pm… pic.twitter.com/mClHzEolLA
— True Crime Updates (@TrueCrimeUpdat) November 2, 2025
