Авион на ирската нискобуџетна авиокомпанија „Рајанер“, кој летал од Солун кон германскиот град Меминген, бил принуден да се врати на аеродромот „Македонија“ кратко по полетувањето, откако екипажот забележал сериозен дефект на моторот. Во инцидентот полесно е повреден 61-годишен државјанин на Србија, а грчките воздухопловни власти започнаа истрага.
Според грчките медиуми, проблемот настанал додека авионот летал над територијата на Македонија. Бидејќи дефектот не можел да се отстрани во лет, пилотите донеле одлука да се вратат во Солун, каде што авионот безбедно слетал.
При слетувањето, делови од оштетениот мотор, според официјалните информации, удриле во прозорецот на патничката кабина, при што бил повреден еден патник. Надлежните наведуваат дека не дошло до оштетување на трупот на авионот ниту до декомпресија на кабината.
По активирањето на итните процедури, на пистата биле распоредени пожарникари, полиција, екипи на итната медицинска помош и други служби. Четворица патници биле превентивно пренесени во болница, а најголем дел од нив биле пуштени по лекарските прегледи.
Повредениот 61-годишен српски државјанин бил задржан во Универзитетската болница АХЕПА во Солун, каде што му биле извршени дополнителни испитувања. Според лекарите, тој се здобил со гребнатини и полесни повреди.
Во јавноста се појавија и тврдења дека прозорецот на авионот бил скршен и дека ситуацијата била многу посериозна, но ваквите информации засега не се потврдени од грчките воздухопловни власти ниту од „Рајанер“.
Авиокомпанијата потврди дека летот бил прекинат поради технички проблем и дека авионот безбедно се вратил во Солун. Компанијата испратила резервен авион со кој поголемиот дел од патниците го продолжиле патувањето кон Меминген.
Грчките надлежни институции спроведуваат истрага за причините за дефектот на моторот и за да утврдат дали делови од него се одвоиле за време на летот.
