Венецуелските власти денеска побараа помош од Организацијата на земјите извознички на нафта (ОПЕК) за запирање на „агресијата“ на САД, кои распоредија воени бродови на Карибите и ја разгледуваат можноста за воздушни напади на тлото на Венецуела.
Американскиот претседател Доналд Трамп, кој изјави дека се бори против нарко-картелите во Мексико и Централна Америка, го засилува притисокот врз Венецуела и претседателот Николас Мадуро со големо воено распоредување во Карибите, вклучувајќи го и најголемиот носач на авиони во светот.
Трамп го обвинува Каракас дека стои зад трговијата со дрога што го преплавува американскиот пазар. Каракас го негира ова и инсистира дека вистинската цел на Вашингтон е промена на режимот и контрола врз нафтените резерви во земјата.
„Се надевам дека можам да сметам на вашите најдобри напори да помогнете во запирањето на оваа агресија, која се подготвува со зголемена сила и која сериозно ја загрозува рамнотежата на меѓународниот енергетски пазар“, се наведува во писмото на Мадура до ОПЕК.
Тоа писмо на онлајн состанокот на ОПЕК го прочита потпретседателката на Венецуела и министерка за нафта, Делси Родригез. „Венецуела формално го осудува пред ова тело фактот дека американската влада се обидува да ги заплени огромните нафтени резерви на Венецуела, најголемите во светот, со употреба на смртоносна воена сила против територијата, луѓето и институциите на земјата“, наведе Мадуро.
Тој додаде дека воената акција „сериозно ја загрозува стабилноста на производството на нафта во Венецуела и глобалниот пазар“.
Трамп предупреди вчера дека воздушниот простор на Венецуела треба да се смета за „целосно затворен“, неколку дена откако Вашингтон издаде предупредување за воздухопловството поради зголемената воена активност во регионот.
