Од 15 јуни на сила стапуваат нови правила за користење на лентите на наплатните станици низ државата, соопшти Јавното претпријатие за државни патишта.
Според новиот режим, лентите означени за МТАГ ќе бидат наменети исклучиво за возила кои користат електронски таг за наплата. Плаќањето со МКард повеќе нема да биде дозволено на овие ленти.
Од претпријатието појаснуваат дека корисниците на МКард и понатаму ќе можат без проблем да ги плаќаат патарините со своите картички, но само на лентите кои се посебно означени за тој начин на наплата.
Целта на измените е да се забрза протокот на возила и да се намалат гужвите на наплатните рампи, особено во пресрет на летната сезона кога значително се зголемува фреквенцијата на сообраќајот на автопатите.
Од Јавното претпријатие за државни патишта апелираат возачите внимателно да ја следат сигнализацијата и навреме да ја изберат соодветната лента пред пристигнување на наплатната станица.
Воедно потсетуваат дека зелената стрелка означува активна лента низ која може да се помине, додека црвеното „Икс“ означува дека лентата е затворена за сообраќај.
Надлежните предупредуваат дека користењето на погрешна лента може да предизвика дополнителни застои и да го забави сообраќајот. Очекувањата се дека новите правила ќе овозможат побрзо, побезбедно и поефикасно поминување низ наплатните станици.
