Во понеделник, во навистина незгоден термин од 13:30 часот — кога најголемиот дел од луѓето се на работа или на училиште — Шкендија и Вардар го одиграа своето прво големо дерби во борбата за шампионската титула оваа сезона.
Средбата беше исполнета со динамика и шанси на двете страни, но поопасни можности имаа тетовчани. Во 31. минута Бесарт Ибраими изведе одличен слободен удар, но голманот Давор Талески блесна со одбрана, а по одбиената топка Вебстер се обиде да погоди, сепак Филип Најдовски со навремена интервенција ја исчисти топката од самата гол-линија.
Во раните минути од второто полувреме, по нафрлување од корнер, топката го погоди Адаму Алхасан во рака, па судијата досуди пенал за Вардар. Давид Бабунски беше сигурен реализатор и со мирен удар го надмудри голманот Бубакар Гаје за водство од 0:1.
Во самата завршница, во 88. минута, Бесарт Ибраими со глава погоди за израмнување, но по преглед на ВАР снимката, голот беше поништен поради офсајд. Така, Вардар си замина со три значајни бода од дербито, а Шкендија остана со вкус на неправда и незадоволство.
