Уставниот суд соопшти дека остро ги осудува, како што наведува, обидите за груба партизација и политизација на неговата работа од страна на одредени политички партии, оценувајќи дека тие настојуваат да ја зголемат сопствената политичка видливост преку злоупотреба на одлуките, активностите и меѓународната соработка на Судот.
Од Судот посочуваат дека унапредувањето на меѓународната соработка било ставено во дневнополитички контекст и искористено за партиски пресметки и собирање политички поени.
Во соопштението се нагласува дека меѓународната соработка останува една од стратешките определби на Уставниот суд и составен дел од неговото институционално работење. Во текот на годинава, Судот потпишал три меморандуми за соработка со Уставниот суд на Косово, Врховниот уставен суд на Египет и Уставниот суд на Србија. Дополнително, годинава му е доверено и претседавањето со Балканскиот форум на уставни судови, како и претставувањето на форумот на значајни меѓународни настани.
Од Уставниот суд истакнуваат дека институцијата ќе остане доследна на својата уставна надлежност и независност и нема да подлегне на политички притисоци, влијанија или обиди за дискредитација.
Воедно, Судот ги повика политичките чинители да покажат повисоко ниво на уставна и политичка култура, а политичките несогласувања да не ги водат преку институциите задолжени за заштита на владеењето на правото и уставниот поредок.
Во соопштението се потенцира дека независноста и кредибилитетот на Уставниот суд се заеднички интерес на целото општество. Оттаму оценуваат дека се недозволени тврдењата на одредени политички субјекти дека одлуките на Судот се „неуставни“ или „незаконски“, потсетувајќи дека согласно член 112 од Уставот, одлуките на Уставниот суд се конечни, извршни и задолжителни за сите.
Од Судот додаваат дека за нив нема значење какви имиња носат улиците, училиштата или другите инфраструктурни објекти, бидејќи тоа се политички одлуки. Нивната надлежност, како што наведуваат, е да оценат дали тие се донесени во законски пропишана постапка.
Како пример за независното постапување ги посочуваат претходните одлуки поврзани со законитоста на постапката за преименување на улиците во Општина Чаир.
На крајот, Уставниот суд апелира до сите политички чинители да покажат одговорност во јавната комуникација и да се воздржат од ширење невистини и манипулации на сметка на институцијата која, како што наведува, е чувар на Уставот и уставниот поредок.
