Украинскиот претседател Володимир Зеленски изјави дека Русија се обидува уште подлабоко да ја вовлече Белорусија во војната против Украина и дека разгледува можни нови воени операции од белоруска територија.
Во објава на „Телеграм“, Зеленски наведе дека украинските служби внимателно ги следат контактите меѓу Москва и Минск и предупреди дека постојат индикации за потенцијални нови закани.
Според него, Русија врши дополнителен притисок врз белорускиот претседател Александар Лукашенко со цел Белорусија поактивно да се вклучи во руските воени активности.
„Продолжуваме да ги документираме обидите на Русија да ја вовлече Белорусија подлабоко во војната против Украина“, напиша Зеленски по средбата со украинските воени и разузнавачки претставници.
Тој тврди дека Москва разгледува можност за операции од белоруска територија, кои би можеле да бидат насочени кон северниот дел на Украина, односно правецот Чернихив-Киев, но и кон земји-членки на НАТО.
Белорусија се граничи со Украина, но и со неколку членки на НАТО, меѓу кои Полска, Литванија и Латвија, што дополнително ги зголемува безбедносните тензии во регионот.
Од Москва и Минск засега нема официјална реакција на изјавите на Зеленски.
Белорускиот лидер Александар Лукашенко важи за еден од најблиските сојузници на рускиот претседател Владимир Путин. Уште од почетокот на руската инвазија во 2022 година, Белорусија дозволи нејзина територија да биде користена за дел од руските воени операции против Украина.
Иако белоруски војници досега директно не учествуваа во борбите, Минск подоцна се согласи на своја територија да распореди руско тактичко нуклеарно оружје и хиперсонични ракети.
Зеленски и претходно предупредуваше дека Украина располага со разузнавачки информации кои укажуваат на нови обиди Белорусија да биде вовлечена во конфликтот.
Тој порача дека Украина ќе реагира доколку белоруското раководство одлучи директно да се приклучи на руските воени операции.
