Петмина лекари се уапсени под сомневање дека нелегално увезувале и дистрибуирале фалсификувани производи за естетски третмани, како ботокси, филери и други препарати и дека вршеле нелегални медицински третмани. Четворица од лекарите, според неофицијални информации, се дерматолози од државното здравство, а еден е од приватна ординација.
Акцијата, во која неофицијално се уапсени 10 лица, вчера ја спроведе оделот за организиран криминал при БЈБ на МВР.
Координираната акција е извршена на повеќе локации низ државата, во Скопје, Струмица и во Битола. Извршени се претреси, меѓудругото, и во домовите на лицата опфатени во предметот. При претресите се пронајдени и одземени поголемо количество на лекови и медицински помагала, едно луксузно возило, парични средства, парфеми, телефонски апарати и друго.
Сомневањата се дека групата била поврзана со нелегален увоз и дистрибуција на фалсификувани ботокси, филери и други медицински препарати, кои биле внесувани во Македонија преку нелегални канали од повеќе држави, меѓу кои Кина, Турција и Србија. Производите, според информациите, немале соодветна контрола, дозволи ниту регистрација, а потоа биле пласирани на пазарот.
Овие препарати, кои често се користеле под превезот на естетски третмани, наместо подобрување на изгледот, можеле да предизвикаат сериозни здравствени последици – инфекции, деформитети, трајни оштетувања, па дури и ризик по животот на граѓаните.
Надлежните сè уште не соопштуваат детали за акцијата и за уапсените. Повеќе информации се очекуваат во текот на денешниот ден.