Во изминатото деноноќие во Македонија се регистрирани вкупно 37 пожари на отворен простор, од кои три сè уште се активни.
Според информациите на Центарот за управување со кризи до 7:30 часот утрово, еден пожар е ставен под контрола, а 33 се целосно изгаснати. Активни жаришта има на подрачјето на општините Студеничани, Македонски Брод и Прилеп. Во Студеничани огнот се шири на потегот од селото Моране кон Вртекица и Рамни Габер, каде што е зафатена мешана шума.
Во Македонски Брод активен е пожарот на месноста Видуш, кај Драгов Дол и Локвица, каде што гори ниска вегетација, нискостеблеста шума и грмушки. Во Прилепско и натаму гори пожарот кај селото Чаниште, кој се движи во два правци – кон Зовиќ и кон Крушевица.
Пожарот на депонијата во Делчево е ставен под контрола. Во последното деноноќие целосно се изгаснати уште 33 пожари во повеќе општини, при што гореле сува трева, ниска вегетација, грмушки, како и диви и комунални депонии.
Од ЦУК информираат дека продолжуваат да ја следат состојбата и да ги координираат активностите со надлежните институции и локалните служби.
