Американскиот претседател Доналд Трамп изјави за Њујорк пост дека американските воени бродови повторно се полнат со најсовремено оружје како подготовка за продолжување на нападите врз Иран, доколку мировните преговори во Пакистан не успеат.
Неговата изјава доаѓа во момент кога потпретседателот Џеј Ди Венс замина за Исламабад на завршните мировни разговори, заедно со специјалните пратеници Стив Виткоф и Џеред Кушнер. Трамп оцени дека исходот ќе биде јасен во рок од 24 часа.
„Подготвени сме за нов почеток. Ги полниме бродовите со најдоброто оружје што некогаш е создадено – дури и подобро од она со кое претходно ги уништивме“, изјави Трамп, додавајќи дека ќе го употреби доколку не се постигне договор.
Се очекува разговорите да се фокусираат на барањата САД, особено на повторното отворање на Ормутскиот теснец за меѓународен сообраќај, што клучен услов за секој договор.
Меѓу темите се и прекинот на иранската поддршка на регионалните сојузници, нуклеарната програма, статусот на балистичката ракетна програма и барањето на Техеран за укинување на санкциите.
Иранската делегација во Исламабад се очекува да ја предводат министерот за надворешни работи Абас Аракчи и претседателот на парламентот Мохамад Багер Галибаф. И Иран достави листа од свои барања за постигнување на траен мир.
Трамп изрази сомнеж во искреноста на Иран, наведувајќи дека пораките што ги добиваат се спротивставени, и заклучи: „Имаме работа со луѓе за кои не знаеме дали ја кажуваат вистината. Ќе видиме.“
