Американскиот претседател Доналд Трамп потпиша меморандум со кој се предвидува големо зголемување на бројот на комерцијални вселенски лансирања од САД. Целта на Белата куќа е до 2030 година да се овозможат
најмалку 1.000 лансирања и враќања на летала од вселената годишно, наспроти 178 минатата година.
Американските владини агенции треба да соработуваат со приватните компании за развој на инфраструктурата, побрзо издавање дозволи и обезбедување соодветен безжичен спектар за вселенските операции. Меморандумот предвидува и пронаоѓање нови локации за лансирање на земјиште во државна сопственост, како и определување приоритетни воздушни коридори.
Во рок од 90 дена треба да биде определена и нова федерална локација за враќање на вселенските летала на Земјата. Трамп истовремено поставува цел американските астронаути повторно да стапнат на Месечината до 2028 година, а првите елементи на идна лунарна база да бидат поставени до 2030 година.
НАСА треба да го поттикне комерцијалниот транспорт до Месечината, роботските мисии кон Марс и да ги истражи можностите за идни комерцијални мисии со луѓе до Црвената Планета. Во американскиот комерцијален вселенски сектор моментално доминира „Спејс Икс“, кој само во 2025 година извршил 170 лансирања и поставил околу 2.500 сателити во орбитата.
