Американскиот претседател Доналд Трамп упати серија остри коментари за Сомалија и сомалиските мигранти, откако неговата администрација објави дека привремено ги запира сите апликации за имиграција од 19 неевропски држави, со образложение дека тоа е неопходно за националната и јавната безбедност.
Трамп говореше на состанок во Минесота, каде што, според локалните правосудни органи, повеќе од милијарда долари биле нелегално исплатени на непостоечки социјални служби преку лажни сметки поврзани со лица од сомалиска заедница.
Истовремено, администрацијата соопшти дека ја запира обработката на сите имиграциски барања – од зелени карти до апликации за државјанство – од 19 неевропски земји кои веќе беа делумно ограничени уште во јуни. На списокот се: Авганистан, Бурма, Чад, Конго, Еритреја, Хаити, Иран, Либија, Сомалија, Судан, Јемен, Венецуела, Бурунди, Куба, Лаос, Сиера Леоне, Того и Туркменистан.
Во официјалниот меморандум се посочува и неодамнешниот напад врз припадници на Националната гарда во Вашингтон, при кој беше убиен еден гардист, а друг сериозно ранет. За нападот е уапсен осомничен Авганистанец. Документот повикува на „темелно преиспитување“ на сите апликации, вклучително и можни повторни интервјуа со кандидатите.
Откако се врати во Белата куќа во јануари, Трамп го постави за приоритет заострувањето на имиграциската политика, испраќањето федерални агенти во големите градови и зголемувањето на депортациите. Минатата недела изјави дека сака „трајно да ја суспендира имиграцијата од сите земји од третиот свет“.