Американскиот претседател Доналд Трамп издаде претседателски декрет со кој наложи повлекување на Соединетите Американски Држави од вкупно 66 меѓународни организации, оценувајќи дека тие повеќе не ги штитат националните интереси на земјата, јавува ДПА.
Со одлуката, на федералните институции им е наложено „што е можно поскоро“ да го прекинат учеството и финансирањето на 31 тело на Обединети нации, како и на уште 35 меѓународни организации надвор од системот на ОН. Од Белата куќа соопштија дека овие организации делуваат спротивно на безбедноста, економскиот просперитет и суверенитетот на САД.
Според американската администрација, дел од засегнатите институции промовираат агенди поврзани со климатските политики, животната средина и родовата еднаквост, кои, според Трамп, не се во согласност со приоритетите на Вашингтон.
„Претседателот Трамп го прекинува учеството на САД во меѓународни организации кои ја поткопуваат независноста на Америка и ги трошат парите на даночните обврзници“, се наведува во официјалното соопштение на Белата куќа.
Државниот секретар Марко Рубио изјави дека САД се повлекуваат од, како што ги нарече, „антиамерикански, бескорисни и расипнички организации“, додавајќи дека процесот на ревизија ќе продолжи и за други меѓународни тела.
Меѓу организациите од кои САД се повлекуваат се и Меѓувладиниот панел за климатски промени (IPCC), како и Меѓународниот институт за демократија и изборна помош. Засегнати се и повеќе тела на ОН, вклучувајќи ја и Рамковната конвенција за климатски промени.
Од Обединетите нации засега нема официјален одговор, но најавена е изјава во текот на денот.
Овој потег доаѓа во период кога Трамп се приближува до првата годишнина од својот втор мандат, кој е силно обележан со политиката „Америка на прво место“. Од враќањето на функцијата, тој веќе иницираше повлекување на САД од неколку меѓународни рамки, меѓу кои и Светска здравствена организација и УНЕСКО.
