Тајфунот „Долфин“ се приближува до источниот брег на Кина, носејќи обилни врнежи, силен ветер и опасност од поплави и свлечишта.
Во Шангај се откажани повеќе од 1.300 летови, додека властите евакуираа стотици илјади жители од најзагрозените подрачја. Надворешните делови од невремето веќе го зафатија северен Тајван, вклучувајќи го и главниот град Тајпеј, каде што се регистрирани поројни дождови и се откажани дел од летовите кон Кина.
Според кинеските метеоролози, тајфунот носи ветрови со брзина до 162 километри на час, а во провинциите Жеџијанг и Фуџијан во наредните денови се очекуваат од 200 до 400 милиметри дожд. Во градот Тајџоу се
евакуирани околу 390.000 жители, додека во Шангај од ризичните области се преместени повеќе од 30.000 луѓе.
Властите во Жеџијанг ги прекинаа сите активности на вода, вклучително и траектниот сообраќај и туристичките крстарења, поради опасност од невремето. Се очекува најсилниот удар на тајфунот во текот на денот да ги погоди источните делови на Кина, каде што е издадено предупредување за висок ризик од поплави и свлечишта.
