Повеќе од еден милион жители се евакуирани од источниот дел на Кина, откако тајфунот „Дeлфин“ пристигна на копното и предизвика големи нарушувања во сообраќајот и секојдневниот живот. Најсилно беа погодени провинцијата Жеџијанг и подрачјето на Шангај, каде што беа откажани околу 1.400 летови.
Тајфунот прво удри во градот Јухуан со ветрови до 150 километри на час, а потоа продолжи кон Венџоу, пред постепено да ослабне во тропска бура. Кинеските власти и натаму предупредуваат на обилни врнежи, опасност од поплави и свлечишта, кои се очекува да траат до средината на неделата. Во некои делови од Жеџијанг се прогнозираат и до 500 милиметри дожд за неколку дена. Во Венџоу се евакуирани околу 900.000 жители, додека во Тајџоу своите домови ги напуштиле уште 390.000 луѓе. Затворени се туристички атракции, делови од Дизниленд и Леголенд во Шангај, а прекинат е и траектниот сообраќај во повеќе крајбрежни области.
Кинеските медиуми објавија дека деветгодишно момче се води како исчезнато откако било однесено од морските бранови, но засега нема информации за загинати во Кина. Тајфунот претходно помина низ Филипините, Тајван и јапонската Окинава, каде што предизвика човечки жртви и материјална штета. На Филипините загинаа осум лица, а повеќе од 7.000 жители се сместени во евакуациски центри.
Кинеските власти, во меѓувреме, привеле две лица поради ширење лажни видеоснимки поврзани со тајфунот, создадени или изменети со помош на вештачка интелигенција.
