Тајфунот Бави пристигна до кинеското копно, при што беа евакуирани речиси два милиони луѓе поради опасноста од невремето. Пред да ја погоди Кина, бурата предизвика најголеми штети на јапонските острови и донесе обилни врнежи на Тајван, додека на Филипините во свлечишта загинаа најмалку 17 лица. Само во кинеската провинција Жеџијанг беа евакуирани повеќе од 1,7 милиони жители, а прекинати беа наставата, работата на отворено, стотици летови и железнички линии. Во градот Венџоу, со околу 10 милиони жители, властите евакуираа стотици илјади граѓани поради директната закана од тајфунот.
Иако Бави ослабе и сега е категоризиран како силна тропска бура, метеоролозите предупредуваат дека сè уште носи големи количества дожд и ризик од поплави. Се очекува невремето постепено да слабее додека се движи кон северозападниот дел на Кина.
Тајфунот првично се формираше како супертaјфун со ветрови до 290 километри на час, а потоа ослабе додека се движеше преку Пацификот. На јапонските острови најмалку пет лица се повредени, а илјадници домаќинства останаа без електрична енергија. На Тајван обилните дождови предизвикаа опасност од свлечишта, поради што илјадници жители беа принудени да ги напуштат своите домови. Властите во регионот и понатаму апелираат граѓаните да останат претпазливи бидејќи последиците од бурата сè уште не се завршени.
