Светската здравствена организација (СЗО) соопшти дека моментално ризикот за поширокото население се проценува како низок по смртта на 28-годишна лабораториска работничка во рускиот Институт за истражување на чума во Иркутск, Сибир.
Случајот привлече големо внимание по шпекулациите дека жената можеби била заразена со белодробна чума, но руските власти сè уште официјално не потврдиле дека бактеријата Yersinia pestis била причината за смртта.
Од СЗО информираат дека се во комуникација со руските здравствени власти и побарале дополнителни информации за здравствената состојба на работничката, условите под кои се разболела, како и за лабораториските анализи и резултатите од нив.
„Врз основа на неофицијално достапните информации, ризикот за јавното здравје кај општата популација изгледа низок“, наведуваат од организацијата.
Починатата била вработена во Иркутскиот институт за истражување на чума на Сибир и Далечниот Исток, установа која работи со опасни патогени микроорганизми.
Според руската агенција Роспотребнадзор, жената починала откако развила „пневмонија од непозната етиологија“, односно воспаление на белите дробови чија причина не е утврдена. Од агенцијата тврдат дека дополнителните анализи не покажале присуство на микроорганизми поврзани со патогените со кои таа работела.
Руските власти наведуваат и дека не бил регистриран никаков инцидент при работа со опасни микроорганизми во институтот.
Сепак, по случајот биле преземени превентивни мерки. Болницата во Шелехов, каде што била лекувана работничката, била ставена под карантин, а околу 200 лица кои можеле да бидат во контакт со неа биле ставени под медицински надзор, според медиумските информации.
Белодробната чума претставува најтешка форма на заболување предизвикано од бактеријата Yersinia pestis. За разлика од бубонската чума, оваа форма може да се пренесува од човек на човек преку респираторни капки и може да биде смртоносна без навремено лекување. Современите антибиотици, сепак, се ефикасни доколку терапијата започне рано.
Случајот го следат и американските власти. Стејт департментот соопшти дека САД, во соработка со Центрите за контрола и превенција на болести (ЦДЦ), ја следат состојбата и побарале од Москва транспарентно споделување на информациите.
Засега нема потврда дека чумата е причината за смртта, а СЗО не прогласи поширока здравствена опасност. Организацијата очекува дополнителни лабораториски резултати за да се утврди што точно се случило во Иркутск.
