На денешното рочиште во судницата во Идризово за случајот со пожарот во дискотеката „Пулс“, сведокот Драги Илиевски изјави дека Општина Кочани навремено го поништила известувањето за користење паркинг-простор и побарала да не се издаде лиценца за работа на објектот, бидејќи се наоѓал во индустриска зона.
Одговарајќи на прашања од Јавно обвинителство, Илиевски појасни дека објектот бил лоциран во зона Г2, наменета за лесна и незагадувачка индустрија, каде не е дозволена угостителска дејност од ваков тип. Тој нагласи дека не била направена пренамена и дека зоната не може да се менува.
Сведокот истакна дека уште во 2012 година Општината првично дала позитивно мислење за користење паркинг-простор, но подоцна го повлекла откако дознала дека во објектот ќе се отвора дискотека. Во известувањето било наведено дека локацијата не е наменета за ваква дејност.
Според неговото сведочење, Општината се обратила и до надлежните институции со цел да се спречи отворањето на ноќниот клуб. Тогашниот градоначалник побарал информација од Министерството за економија дали е издадена лиценца, а дополнително било испратено и барање до Државниот пазарен инспекторат да не се издава дозвола.
Илиевски посочи дека неговиот сектор нема надлежност за инспекциски надзор и нема информации дали други институции презеле мерки откако објектот започнал со работа. Дел од прашањата на обвинителството во судницата не биле дозволени од Судот, со образложение дека сведокот веќе дал доволни појаснувања.
На прашања од одбраната, тој потврдил дека објектот бил изграден како индустриски, а за користење јавни паркиралишта Општината дава мислење, додека дозволите ги издава Министерство за внатрешни работи.
Судот претходно прифатил повлекување на дел од сведоците предложени од обвинителството, додека останатите ќе бидат повикани во наредниот период.
Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во земјата, со 63 загинати и над 200 повредени. Судењето го води судијката Дијана Груевска-Илиевска.
