Со изведување на градежното вештачење на објектот „Пулс“ и распит на вештите лица кои го изработиле, денеска во судницата во „Идризово“ продолжува судењето за пожарот во кочанската дискотека, во кој на 16 март 2025 година загинаа 63 лица, а над 200 беа повредени.
На претходното рочиште, судскиот вештак и професор на Градежниот факултет при УКИМ, Горан Марковски, кој во периодот на изработка на вештачењето бил декан на факултетот, истакна дека анализата покажала сериозни пропусти во функционирањето на институциите и одговорните лица.
Според Марковски, во објектот не биле почитувани стандардите, регулативата и пропишаните процедури, а особено загрижувачки било што не биле преземени мерки за противпожарна заштита.
Тимот вештаци од Градежниот факултет констатирал дека објектот немал ниту еден прописен излез за евакуација, додека според неговата површина, капацитетот бил 363 лица. Во критичната ноќ, пак, во дискотеката имало повеќе од 600 посетители.
Марковски посочи дека условите во објектот дополнително придонеле за ширењето на последиците од пожарот.
„Објектот немал каде да дише. Целата температура се задржувала внатре. Ниту една мерка немало преземено која би го олеснила ризикот или ефектите од појавата на пожарот“, изјави тој.
Во вештачењето била направена и класификација на материјалите вградени во објектот. Според Марковски, бил пронајден стиропор, кој во најдобар случај може да се класифицира како нормално горлив материјал и при горење испушта токсичен чад и горливи капки.
Другиот материјал, тервол или стаклена волна, спаѓа во класа А2 на негорливи материјали и е стабилен до температури од 800 степени Целзиусови.
Марковски посочи дека промената на бојата на материјалот упатува дека температурата во клубот достигнала најмалку 800 степени Целзиусови. Како дополнителен показател ги наведе деформираните делови од челичната конструкција, како и пронајдените стопени стаклени шишиња.
На прашање од обвинителот Дарко Јакимовски, Марковски посочи дека причинско-последичните врски се многубројни и дека вештаците не успеале да најдат докази дека биле преземени мерки за намалување на последиците од пожарот.
Тој ги посочи, меѓу другото, материјалите, контролата, ангажирањето и изработката на прописна документација, ангажирањето лиценцирани фирми за пренамена на објектот и стручниот надзор.
Со денешното рочиште, како што е најавено, треба да заврши изведувањето на доказите од Обвинителството.
Судењето го води судијката Дијана Груевска-Илиевска, а обвинението го застапува тим од 15 јавни обвинители.
Пожарот во дискотеката „Пулс“ во Кочани се случи за време на настапот на групата ДНК. Во трагедијата загинаа 63 лица, а над 200 беа повредени.
