Јавното сообраќајно претпријатие „Скопје“ започнува со воведување дигитална студентска картичка преку која студентите на државните универзитети во Скопје ќе можат да го користат бесплатниот јавен превоз.
Новата услуга ќе функционира целосно дигитално, преку автоматска размена и синхронизација на податоците меѓу ЈСП Скопје и универзитетите. Со тоа, студентите нема да имаат потреба да доставуваат потврди во хартиена форма или лично да посетуваат билетарници за заверка на студентскиот статус.
Од ЈСП информираат дека студентите ќе добијат упатства на нивните електронски адреси, по што преку мобилната апликација „Скопје бус“ ќе можат да ја активираат својата дигитална превозна картичка.
При најавувањето во апликацијата, потребно е да ја користат истата е-пошта со која се регистрирани на универзитетот.
Дигиталната картичка ќе биде достапна во апликацијата преку кју-ар код, кој студентите ќе го користат за валидација при користење на јавниот превоз.
Од претпријатието најавуваат дека дополнителните информации за начинот на активирање и користење на картичката ќе бидат објавени навремено.
