Општина Аеродром важи за еден од најурбанизираните делови во Скопје, но му требаат реконструкцијата на улиците. Периодов пред нас се прави токму тоа, се врши инфраструктурен зафат во кој се вклучени 18 улици во должина од над 5 километри. Деновиве се работи во населбата Мичурин, се реконструкција, улицата „Симеон Кавракиров”. Локалните власти велат улицата ќе добие нов, современ изглед и значително подобра функционалност.
Тоа е добро. Ама за подобра сообраќајна функционалност во Мичурин се чини треба да се направи многу повеќе. Едноставно, мора нешто дополнително да се изгради, а мора и нешто повеќе да не се гради.
Звучи чудно? Но, фактите на теренот зборуваат дека предлогот има логика. Постојната инфраструктура колку и да се поправа се потешко го следи масовното градење на згради во Мичурин и тоа на места каде беа обични куќи. Прекрасната населба во последниве години се претвори во ново Дебар Маало, со зграда до зграда и со сè помалку простор за нормално функционирање. Нема место каде да се разминат возилата, а не пак да се паркираат.
Затоа, покрај реконструкција на постојните улици, потребно е и сериозно урбанистичко планирање на тој простор. Инаку, како тргнала работава во Мичурин ќе мора да се прават двоспратни улици, оти едноспратните куќи станаа 8-катни згради.
