Србија во наредните пет до шест години планира целосно да ги укине класичните наплатни рампи на автопатиштата и да воведе модерен систем за електронска наплата без запирање.
Новиот модел ќе овозможи возачите непречено да се движат по автопатите, а наплатата ќе се врши автоматски преку ТАГ-уреди и современи системи за електронско препознавање на возилата.
За македонските возачи ова ќе значи побрзо и полесно патување низ Србија, особено за време на летната сезона и празничните викенди, кога на наплатните рампи редовно се создаваат долги колони.
Македонските корисници на ТАГ-уреди ќе можат и понатаму да ги користат своите уреди преку постојната регионална платформа, без потреба од дополнителни процедури.
Од јавното претпријатие „Патишта на Србија“ информираат дека засега не се планира поскапување на патарините. Износот што ќе го плаќаат возачите и понатаму ќе зависи од поминатото растојание и категоријата на возилото.
Во моментов повеќе од 65 проценти од приходите од патарини во Србија веќе се реализираат преку електронска наплата, а системот за непрекинато поминување без запирање веќе се тестира на белградската обиколница.
Во следната фаза, српските власти планираат системот да го поврзат и со други европски држави, што дополнително би го олеснило патувањето на возачите од регионот и би овозможило користење на ист електронски систем во повеќе земји.
