Градоначалникот на општина Карпош, Стевчо Јакимовски, преку емотивна објава на својата официјална Фејсбук страница, упати критика за состојбата со хигиената и општата слика на општината, изразувајќи незадоволство и грижа за секојдневието на жителите.
-Ќе бидам искрен – срам ми е како изгледа Карпош овие денови, напиша Јакимовски, посочувајќи на преполните контејнери, расфрланиот смет и запуштеноста со која се соочуваат граѓаните.
Тој додаде дека го боли фактот што луѓе кои чесно ги плаќаат своите давачки не добиваат соодветна услуга и услови за живеење, нагласувајќи дека дел од проблемите се надвор од општинските надлежности.
-Не ми е лесно ни мене како градоначалник да гледам дека надвор од мојата надлежност, некој не си ја врши работата – а граѓаните страдаат. И не е тоа некаков изговор – туку чувство на немоќ и горчина што не можам сам да го решам она што е системски проблем, пишува тој.
Јакимовски апелира дека Карпош не смее да изгледа вака и дека општината и нејзините жители заслужуваат повеќе – достоинствено секојдневие, чиста средина и одговорно постапување од сите институции.
