Мече кое било заробено во нелегално поставена примка е спасено во координирана акција на планината Јакупица, во Велешко. Животното било пронајдено од ловџии од Ловечкото друштво „Руен“ од Велес, кои за време на лов слушнале силно рикање и тргнале по звукот.
Еден од ловџиите раскажува дека мечето било видно вознемирено и агресивно поради болката, но истовремено барало помош. Во непосредна близина се наоѓала и неговата мајка, која внимателно ја следела целата ситуација.
По пријавата, била организирана спасувачка акција во која учествувале инспектори од Државниот инспекторат за животна средина, членови на Ловечкото друштво „Руен“, претставници на Македонското еколошко друштво (МЕД), полициски службеници од СВР Велес и ветеринар од Зоолошката градина во Скопје.
Од Државниот инспекторат за животна средина информираа дека мечето било пронајдено на локацијата Чеплес, на околу 1,5 километри од Рибник Нежилово, каде што било фатено во нелегално поставена сајла.
Животното било успиено за безбедно да се отстрани примката, по што ветеринарот извршил детален преглед. Не биле констатирани видливи повреди, па мечето било вратено во неговото природно живеалиште.
При прегледот било утврдено дека станува збор за мажјак стар околу три години, со тежина од приближно 70 килограми.
За случајот е известен јавен обвинител од Велес, по чија наредба полицијата ја одзела примката за вештачење. Надлежните најавуваат кривична постапка, бидејќи поставувањето примки за лов на диви животни претставува кривично дело според македонското законодавство.
