Претседателката на Словенија, Наташа Пирц Мусар, денеска ќе биде пуштена на домашно лекување откако вчера беше примена во болница поради полесни повреди здобиени во сообраќајна несреќа.
Несреќата се случила во тунелот Кастелец на крајбрежниот автопат, по што словенечката претседателка била пренесена во болницата во Изола, каде ѝ била укажана медицинска помош.
Според информациите од Полициската управа Копер, во сообраќајката учествувале две службени полициски возила кои се движеле во конвој за придружба на заштитено лице.
Во несреќата биле повредени две лица. Едното се здобило со полесни повреди, додека другото претрпело потешки повреди.
Полицијата во Копер продолжува со истрагата за утврдување на причините и околностите под кои се случила несреќата.
