Претседателката на државата, Гордана Сиљановска-Давкова, од денеска престојува во официјална посета на Словачка, каде што ќе оствари повеќе средби со највисоките словачки државни претставници.
Според најавената агенда, утре во Братислава таа ќе биде пречекана со највисоки државни и воени почести од словачкиот претседател Петер Пелегрини. Предвидена е тет-а-тет средба меѓу двајцата претседатели, по што ќе следува пленарен состанок меѓу делегациите на двете земји.
Во рамки на посетата, Сиљановска-Давкова ќе се сретне и со претседателот на Националниот совет на Словачка, Рихард Раши, како и со потпретседателот на словачката влада и министер за одбрана, Роберт Калинак.
Во програмата е вклучено и полагање венец на Споменикот на слободата, кој се наоѓа во близина на Замокот Девин, едно од најпознатите историски обележја во земјата.
Во среда, македонската претседателка ќе ја посети и групната изложба „Од глаголица до светлина: Визуелна ода за Св. Кирил и Методиј“, на која ќе бидат претставени дела од македонските уметници Ана Митевска, Ангел Коруновски, Лазе Трипков и Александра Костадиновска. Куратор на изложбата е Кирил Пенушлиски.
