Претседателката Гордана Сиљановска-Давкова денеска оствари средба со претставнички на здружението за хумана репродукција и биопотпомогнато оплодување „До бебе по патот на ин-витро“, на која се разговараше за предизвиците со кои се соочуваат лицата кои минуваат низ процесот на асистирана репродукција.
На средбата присуствуваа претседателката на здружението Деспина Петровска, како и членовите Наташа Ѓорѓиева Божинов и Марија Михајлоска Јанкуловска.
Сиљановска-Давкова им ја изрази својата поддршка на сите жени и мажи кои се одлучуваат да станат родители преку ин-витро постапка, нагласувајќи дека станува збор за луѓе кои покажуваат голема сила и истрајност.
Таа го поздрави ангажманот на здружението, кое се залага за подобрување на правата и условите за пациентите што поминуваат низ процесот на ин-витро оплодување, но и за создавање услови за достоинствено мајчинство и родителство.
Претставничките на здружението информираа дека, според податоците на Светската здравствена организација, едно од шест лица во светот се соочува со неплодност, при што проблемот подеднакво ги засега и мажите и жените.
Како значаен чекор ги посочија измените на Законот за здравствена заштита, со кои бројот на бесплатни ваучери за ин-витро постапки е зголемен од три на шест обиди, а лекот клексан е овозможен преку издавање на рецепт.
На средбата биле презентирани и идните приоритети на здружението, меѓу кои се зголемување на средствата за поквалитетна терапија, можност генетските испитувања и анализи да се вршат во Македонската академија на науките и уметностите, како и пренаталните испитувања наместо во странство да се реализираат во државата.
Претставничките укажаа дека, имајќи го предвид проблемот со намалениот наталитет, потребна е долгорочна и системска поддршка за лицата кои се соочуваат со неплодност.
Според претседателката, иако станува збор за помала група граѓани, поддршката за нив има пошироко значење и позитивен ефект врз целото општество.
