Претседателката Гордана Сиљановска-Давкова од Братислава порача дека Македонија останува цврсто посветена на членството во Европската Унија, но очекува да биде третирана еднакво како и другите земји-кандидати и да биде оценувана според Копенхашките критериуми, а не преку билатерални спорови и идентитетски прашања.
На заедничката прес-конференција со словачкиот претседател Петер Пелегрини, таа истакна дека Македонија и Словачка ги поврзуваат силни историски, културни и духовни врски, изразувајќи уверување дека посетата ќе придонесе за понатамошно зајакнување на билатералната соработка.
Сиљановска-Давкова нагласи дека постои значителен простор за продлабочување на економските односи меѓу двете земји, особено во енергетиката, иновациите, зелената транзиција, инфраструктурата и туризмот. Таа потсети и на неодамна организираните бизнис-форуми, како и на отворањето на авиолинијата Охрид–Братислава.
Претседателката ја поздрави и словачката поддршка за македонскиот јазик и култура, посочувајќи го отворањето на Лекторатот по македонски јазик на Универзитетот „Константин Филозоф“ во Нитра, воведувањето на настава по македонски јазик и објавувањето на првиот учебник по македонски јазик за словачките ученици.
Осврнувајќи се на евроинтегративниот процес, таа оцени дека Македонија предолго се соочува со пречки кои не се во согласност со европските вредности и принципи.
„Европа е наш природен дом – географски, историски и културно. Бараме да бидеме третирани како сите останати, да бидеме вреднувани според Копенхашките критериуми и да добиеме можност да се посветиме на реформите и владеењето на правото, наместо на билатерални прашања“, изјави Сиљановска-Давкова.
Таа го поздрави ставот на Словачка дека идентитетските и културните прашања не треба да бидат дел од политичките условувања во процесот на проширување на Европската Унија, нагласувајќи дека почитувањето на културниот интегритет на секој народ е суштински дел од европската идеја.
Сиљановска-Давкова додаде дека интеграцијата на Западен Балкан претставува не само политичко, туку и безбедносно и стратешко прашање, особено во време на глобални геополитички предизвици и растечки конфликти.
На крајот од обраќањето, таа изрази уверување дека разговорите во Братислава ќе донесат нова динамика во македонско-словачките односи и ќе отворат можности за уште поинтензивна соработка во иднина.
